Norborg/Brattvåg2 – Valder 1-1 (1-1)
4. divisjon, Uggedal stadion, 15.05.2019

Sjansar: 7-11

1-0 Ådne Hellandsvik (20)
1-1 Jonathan Mulelid (45)

Heimelaget kan seie seg mest nøgd med poengdeling i toppoppgjeret mot Valder og kan takke sin dyktige keeper Neydson Da Silva for at det berre vart eitt baklengs. Spesielt lynraske Andreas Kvam skapte store problem for Norborg på sin høgrekant og stod bak det meste Valder skapte. Norborg kjempa hardt og tok også leiinga på eit flott skot av Ådne Hellandsvik, som spelte sin første kamp etter opphaldet i USA. Jonathan Mulelid utlikna på overtid i ein underhaldande og open 1. omgang. I ein meir rotete 2. omgang skapte Valder dei fleste sjansane, men Norborg haldt unna og har stadig til gode å sleppe inn mål etter pause i år. Norborg har også til gode å tape ein heimekamp sidan 29. september 2017. På biletet ser vi Neydson på veg til å gjere ei av sine mange redningar.
Les meir..

Norborg/Brattvåg2 tek imot Valder til årets første graskamp i Uggedalen. Begge lag har fått ein bra start på sesongen og ligg på delt 2. og 4. plass. Det er dermed klart for eit nytt toppoppgjer for Norborg, som gjekk på eit bittert tap for Bergsøy sist veke. Valder på si side snudde 0-1 til siger over Larsnes/Gursken og har poenget meir enn dei oransje.

Norborg får tilbake Benjamin Rørhus, Ronald Olsen, Vidar Nilsen Rogne, Ådne Hellandsvik og Ole Johan Urke i troppen frå sist, men har usikre kort i Per Kristian Helle Hildre, Per Kristian Grytten Søvik, Siver Davik, Jesper Vos, Ruben Holmeset og Gard Rogne.

Valder har tradisjonelt vore ein gjengangar på øvste krinsnivå, men måtte ta seg ein tur ned å spele i 5. divisjon 2017. Etter å ha sikra seg KM-tittelen der kom ein på 8. plass i 4. divisjon i fjor. I vinter har laget henta heim ein del spelarar og bør sikte seg inn blant topp 4.

Det tok 33 år før Norborg fekk møte Valder i seriekamp. Det var i 2001, og sidan den gong har laga møttest jamleg. Dette blir det 19. møtet mellom laga og poenga har blitt delt broderleg med 25 poeng kvar (7-4-7). Som regel vinn heimelaget. Det håper vi skjer denne gong også.

Dommar: Jan Erik Bratteberg (Ørsta)
Assistentar: Kim Svensson (Aksla) og Ole Petter Stenberg (Sunnylven)

Andre kampar:
Hareid – Rollon (onsdag) B
Hødd2 – SIF/Hessa H
Larsnes/Gursken – Emblem (torsdag) H
Volda – Ørsta H
Bergsøy – Blindheim H

Magnus Austbø Seth var på rett plass til rett tid å sette inn Norborg/Brattvåg2 sitt mål mot Bergsøy. Han har med det scora i 12 strake seriekampar. Ikkje sidan 6-0 sigeren over Sæbø 23. august i fjor har han gått mållaus av bana i ein seriekamp. På desse 12 kampane har det blitt heile 28 mål.

Magnus Austbø Seth
Født: 07.11.1999
Frå: Brattvåg
A-lagsdebut: 02.03.2016 mot Valder
Første A-lagsmål: 02.04.2016 mot Vigra
Første seriemål: 13.05.2016 mot Skarbøvik

Kampar og mål for Norborg og Norborg/Brattvåg2:
2016: 24 kampar / 9 mål [20 seriekampar / 7 mål]  [4 treningskampar / 2 mål]
2017: 29 kampar / 21 mål [16 seriekampar / 6 mål] [13 treningskampar / 15 mål]
2018: 32 kampar / 37 mål [21 seriekampar / 31 mål] [11 treningskampar / 6 mål]
2019: 14 kampar / 22 mål [3 seriekampar / 4 mål] [11 treningskampar / 18 mål]
Totalt: 99 kampar / 89 mål [60 seriekampar / 48 mål] [39 treningskampar / 41 mål]

Bergsøy – Norborg/Brattvåg2 2-1 (2-0)
4. divisjon, Havila Stadion Fosnavåg, 10.05.2019

Sjansar: 7-6
Avslutningar på mål: 5-5
Avslutningar utanfor: 6-6
Blokkerte avslutningar: 0-3
Cornere: 3-3

1-0 Daniel Kvalsvik (26)
2-0 Sjølvmål (30)
2-1 Magnus Austbø Seth (56)

Laga hadde kvar sin omgang på flotte Havila stadion i Fosnavåg. Bergsøy leia fortent til pause, medan Norborg kom sterkt etter kvila og føler seg snytt for poeng etter at Patrik Hjelmseth sette ballen i nota til det alle trudde var 2-2, for så å bli avvinka for offside. Endå meir fortviling vart det då same mann vart vist sitt andre gule kort og dermed raudt for sin spontanreaksjon då han skjønte målet vart annullert. Norborg var nær utlikning i sluttminutta, men måtte gå av bana med tap for første gong sidan mai 2018.

I dag reiser vi skuffa heim over at vi ikkje får med oss noko ut av denne kampen, men samstundes nøgd med måten vi gjennomfører store deler av kampen. Vi trykker Bergsøy gjennom heile 2. omgang, sjølv med ein mann mindre så er vi det beste laget på bana. Vi får ta med oss opplevinga heim og fortsette jakta på poeng neste uke, sa trenar Kristian Søviknes.
Les meir..

Nummer 1 og 2 på tabellen etter 2. serierunde møtest på Havila Stadion i Fosnavåg fredag kl. 19. Norborg/Brattvåg2 står som einaste lag med full pott i 4. divisjon. Det gir sjølvtillit inn mot den antatte opprykksfavoritten.

Norborg får tilbake Anders Toven frå skade og Ruben Holmeset frå sjukdom, men må fortsatt klare seg utan dødballspesialist Ole Johan Urke og målvaktene Benjamin Rørhus og Sander Arntsen. Då er det godt å ha Brattvåg sin gode Neydson Da Silva i bakhand.

Bergsøy vart nok tatt litt på senga av Hareid i serieopninga, men redda poenget etter å ha kome under både 0-2 og 2-3. I sist kamp mot Larsnes/Gursken løfta laget seg og vann 0-2. Eit sjølvmål og ei scoring av den tidlegare L/G spelaren Thomas Sætre Hauge sørga trepoengeren. Hareid viste at det er mogeleg å ta poeng frå Bergsøy, men når ein møter spelarar som Franjo Tepuric og Magnus Myklebust så må konsentrasjonen vere på topp gjennom samtlege minutt. Den tidlegare Hødd, Lillestrøm, Odd og Kongsvinger spelaren Myklebust har for øvreg møtt Norborg før. Det var i 2001 då han spelte for Gursken i 5. divisjon. Norborg vann for øvreg 4-0 heime og 4-1 borte.

Dommar: Martin Javier Solheim (Spjelkavik)
Assistentar: Henning Skjeret (Volda) og Per-Inia Brekke (Hareid)

Tidlegare møter:
Norborg har ingen god statistikk mot Bergsøy. På 10 kampar har Bergsøy vunne 9 og Norborg 1. Målskilnad 45-17 i favør Bergsøy. Norborg sin siger kom i 2008 då ein vann 2-0 i Uggedalen etter mål av Tarjei Gjerset Urkedal og Morten Kalvø.

To kampar i 4. divisjon vart spelt torsdag kveld. Larsnes/Gursken tok leiinga ved Robert Auflem Vik borte mot Valder, men heimelaget kom sterkt tilbake etter pause og snudde kampen til 2-1 etter mål av Jonathan Mulelid og Peter Eikås Larsen. Dermed tok Valder tabelltoppen, medan Larsnes/Gursken stadig ventar på sitt første poeng. Det må seiast at dei har hatt tre veldig tøffe kampar.

Emblem fekk avlyst sin kamp mot Hødd2 sist veke (ny dato for den kampen er måndag 20. mai) og eit spelesugent Emblem tok årets første siger då dei vann 1-0 heime mot Hareid etter mål av Damian Alin-Constantin. Hareid gjekk dermed på sitt første tap etter å ha starta med to uavgjorte. Vi legg elles merke til at den tidlegare Norborg-spelaren Marius Finstad Austnes har meldt overgong til Emblem og starta kampen.

Resten av runda spelast fredag:
Blindheim – Ørsta B
SIF/Hessa – Volda B
Rollon – Hødd2 H

At Ørsta skulle ta tre poeng heime mot SIF/Hessa overraskar få, men at dei kvite og svarte skulle vinne heile 6-1 er imponerande. Hareid fortsette å plukke poeng, men måtte nok ein gong gi frå seg leiinga. 1-1 mot eit så godt lag som Valder er likevel bra for dei nedrykksdømde. Toppkampen mellom Volda og Rollon enda også 1-1, medan Bergsøy slo tilbake med ein sterk 0-2 bortesiger over Larsnes/Gursken. Hødd2 og Emblem vart utsett.
Tabell

Blindheim – Norborg/Brattvåg2 1-2 (1-1)
4. divisjon, Blindheim KGB, 03.05.2019

Sjansar: 8-8
Hjørnespark: 5-8

0-1 Fredrik Hurlen (13)
1-1 Henning Hareide (41)
1-2 Magnus Austbø Seth (51)

Norborg står som einaste lag med full pott etter 2 serierunder og kan reise til Fosnavåg neste fredag utan press. Kampen mot Blindheim vart ei tøff batalje der begge lag hadde sjansar nok til å score både eitt og to til. Sjølv om det vart jamt i sjansestatistikken, så var Norborg best i banespelet og hadde meir trøkk i åpent spel.

-Stolt av innsatsen som gutta legg ned. Vi har ein klar plan på kva vi ønsker som blir løyst bra ute på bana. Blir litt stressande siste ti minutta sidan vi ikkje får punktert kampen med 1-3, men vi rir det bra av til trass for at Blindheim flytter opp mykje folk. Ein betre start på sesongen kunne vi ikkje fått med to strake sigrar og full pott. Vi reiser nå til Fosnavågen neste veke med lave skuldre og god sjølvtillit, sa trenar Kristian Søviknes etter kampen.
Les meir..

Norborg/Brattvåg2 møter Blindheim på dagen 1 år etter at oransjetrøyene vann 3-0 i Uggedalen. Den gong hadde Norborg presset på seg sidan Blindheim hadde opna med 9 poeng på 3 kampar, medan Norborg berre stod med 4. Framfor fredagens møte så er rollene snudd. For det første tapte Blindheim sin første kamp medan Norborg vann, og for det andre så går denne kampen på Blindheim stadion med GRATIS inngang. Så her er det berre å ta turen til Blindheim sitt flotte anlegg med tribune under tak.
Les meir →

For første og siste gong før siste runde i oktober så spelast alle kampane i 4. divisjon samstundes. Her er kampane og litt synsing rundt dei:

Hareid – Valder
Heimelaget er spådd som den store dumpekandidaten i årets 4. divisjon, men overraska nær sagt alle då dei lenge hadde Bergsøy i kneståande. Det enda til slutt 3-3, noko vi vel å kalle eit bonuspoeng. Sjølv om Hareid kanskje er betre enn sitt rykte så trur vi Valder tek med seg tre poeng over Breidsundet. Dei har betra spelarstallen sin i vinter og hadde full kontroll på Hødd2 i serieopninga. Hareid er nok ikkje så naive i forsvarsspelet sitt som Hødd2, men vi seie bortesiger.

Hødd2 – Emblem
To lag som tapte serieopninga møtest på Høddvoll. Laget frå Ulsteinvik hadde ingen sjans til å ta Valder sist og tapte 4-2 (låg under 4-0) og med eit tøft program for 1. laget denne veka med cupkamp i dag (4-3 siger over Træff) og ny kamp søndag, så vil det nok ikkje nokon av dei som 16-17 beste spelaren i A-stallen til Hødd vere med. Kan då Emblem som beit godt frå seg mot eit antatt topplag som Volda greie poeng? Ja, vi trur dei greie å kjempe seg til ein uavgjort.

Larsnes/Gursken  – Bergsøy
Heimelaget signerte tre gode spelarar inn mot seriestart, men måtte sjå seg slått 2-1 borte mot Norborg/BIL2. L/G haldt eit høgt nivå før pause i den kampen, sjølv om dei sleit med å produsere sjansar. Divisjonsfavoritt Bergsøy kan få det tøft med å få med seg tre poeng. 3-3 mot Hareid i serieopninga gav nok fosnavågarane eit lite sjokk, og cupkamp mot AaFK (0-3 tap) i dag er ikkje den beste oppladinga. Likevel, vi trur Bergsøy si langt meir offensive kraft bikka kampen i ein bortesiger.

Volda – Rollon
Runda sin toppkamp spelast på Volda stadion. Volda sleit seg til 2-1 over Emblem sist, medan Rollon vann greit 3-1 over Ørsta. Stian Finnøy scora 14 mål på 15 kampar i fjor og haldt fram målteften med to mål i serieopninga. Volda har eit godt lag, men vi held Rollon som betre og gir dei eit knapt favorittstempel.

Ørsta – SIF/Hessa
Topp mot botn på tabellen, men her held vi botnlaget som favorittar. Ørsta hadde ein tøff bortekamp i serieopninga og tapte 3-1, men heime på Aurstad Arena blir dei favorittar mot eit SIF/Hessa som på si side vann 3-0 over Blindheim. Nils Ottar Sandø gjorde to mål i comebacket sitt, men er han med til Ørsta?  Sandø eller ei, vi trur Knut Erik Myklebust og co. tek sine tre første poeng.

Blindheim – Norborg/Brattvåg2, sjå eiga sak.