Norborg tek ikveld imot krinsmeister Spjelkavik2 til årets siste heimekamp i Uggedalen. Vél møtt!

Norborg vart blåst av bana av eit heiltent heimelag på Valdervoll torsdag kveld. Valder har vist svak form i lengre tid og berre vunnet 1 av dei siste 8 kampane. Torsdag kveld sette dei verkeleg inn støtet mot våre gutar for å forsegle vidare spel i 5. divisjon. Liam Nordstrand Nilsen, Ruben Haram Johnsen og Matteo Grønnevik Langlo sørga for 3-0 før halvtimen var spelt. Eit Norborg-lag som mangla mange spelarar hadde lite å stille opp med og vi fekk nærmast ein reprise av 1. omgang etter pause. Ruben Haram Johnsen scora sitt andre mål før to minutt var spelt av 2. omgang og Daniel Valderhaug Molnes gjorde 5-0 få minutt seinare. Are Molnes fastsette sluttresultatet til 6-0 tjue minutt før slutt. Norborg står no med tre strake tap etter den fine starten på haustsesongen, men ein er framleis på trygg grunn sidan både Emblem og Volda2 tapte sine kampar. Neste kamp er heime mot Spjelkavik2 på torsdag kl. 1830. Spjelkavik2 sikra seg KM-tittelen i 5. divisjon med sin siger over NTNUIÅ. Vi gratulerer!

Norborg måtte sjå seg slått 0-3 av studentane i Ålesund. Norborg starta kampen bra og burde ha tatt leiinga ved Tarjei Urkedal då Asgeir Kalvø kom seg rundt på kant og spelte inn til Urkedal, som frå 5 meter avslutta utanfor. Niklas Rekdal hadde også ein god sjanse nokre minutt seinare, men også her gjekk skotet like utanfor mål. Mot slutten av omgangen tok NTNUIÅ meir over og fire minutt på overtid gjorde dei 0-1 på frispark av Herman Johnson. Ein spelar Norborg meinar ikkje burde ha spelt sidan han ikkje har sona for 6 gule kort. 2. omgang starta på verst tenkeleg måte for heimelaget då Sondre Rui Hansen banka inn 0-2 etter corner før to minutt var spelt. Norborg var rysta og NTNUIÅ var nære eit tredje må få minutt seinare, men denne gong stod aluminiummet i vegen. Norborg skapte etter kvart eit par gode sjansar ved Eirik Vågnes og Tarjei Urkedal, men avslutningane gjekk ikkje mellom stolpane. I staden punkterer Glenn Are Elveseter kampen ti minutt før slutt. Norborg har etter ein god periode to strake tap og har igjen rota seg ned i botnstrid. NTNUIÅ passerte Norborg på tabellen med betre målskilnad, medan Emblem ligg poenget bak og Volda2 yttarlegare eitt poeng bak. NTNUIÅ viste seg som eit bra lag, men dei høyre vel meir heime i bedriftfotballen enn hos fotballkretsen..? Får vi sjå Vard, Sparebanken Møre og Høgskulen i Volda med eige lag i framtida?

Norborg spelar torsdag kveld ein særs viktig kamp mot NTNUIÅ. Norborg har tatt 13 poeng på dei 7 siste, men måtte sjå seg slått 4-1 av Blindheim sist veke. NTNUIÅ har berre vunne 1 av sine siste 6, men er likevel ikkje eit dårleg lag. Dei vann 6-1 over Norborg i vår, så her har våre gutar mykje å revansjere. Vél møtt!

Norborg kjempa seg til tre viktige poeng i lokaloppgjeren mot Ravn på Ravn stadion torsdag kveld. Nikolas Fjørtoft sende heimelaget i føringa etter få minutt, men Norborg tok gradvis over kampen og la press på heimelaget. Dryge kvarteret før pause viste Eirik Vågnes fram sin slepne teknikk og la inn framfor mål. Der hadde Ravn tilsynelatande kontroll, men rota det til og ei klarering traff Nicholas Kvammen sin fot og ballen trilla over streken. Norborg hadde trykket, men sleit med å skape dei store sjansane heilt fram til overtida starta. Då vippa Tarjei Urkedal ballen inn framfor mål der Nikolai Jensen kom stupande fram og heada ballen i nota. 1-2 til pause. Heilt fortent etter dette laga viste fram. Norborg gjekk aggressivt til verks etter pause og eit kvarter ut i omgangen stuper Nikolai Jensen nok ein gong fram og header inn ein corner. Nikolas Fjørtoft, som var Norborg sin toppscorar i 2017, nekta å gi opp og skapte ny spenning med å sette eit frispark i mål tjue minutt ut i omgangen. Ravn var det førande laget etter reduseringa mot eit stadig meir slitent gjestelag. Ei 2-3 sjansar vart skapt, men Norborg haldt unna og kunne til slutt juble. Norborg har hatt god form i det siste og tatt 13 poeng på sine 6 siste kampar. Totalt har det blitt 17 poeng på 15 kampar. Det gir førebels 7. plass på tabellen med fem kampar igjen å spele.
Les meir..

Gløym 5. divisjonstabellen. Haramstabellen er årets mest prestisjetunge tabell og den vann Norborg.

1. Norborg…. 4  3-0-1  11-7  9
2. Ravn………. 4  3-0-1  10-6  9
3. Brattvåg2.. 4  0-0-4  2-10  0

Norborg svippa i kveld ein tur innom Ravn stadion i jakt på poeng, og for å komme øvst på Haramstabellen. Ravn står før siste lokaloppgjer med 9 poeng og målskilnad 8-3, Norborg har 6 poeng (8-5), Brattvåg2 0 poeng (2-10). Norborg har Oliver Gamlem og Tobias Flem Hellem ute med karantene, medan Torbjørn Grytten er langtidsskadd. Adrian Andrukiewicz og Ole Martin Fevåg er tilbake frå sist kamp. Sist Norborg spelte A-kamp på Ravn stadion var faktisk heimekampar i 3. divisjon hausten 2009 då ein la kunstgras på Uggedal grus. Det enda med 3-0 over Rollon, 1-1 mot Spjelkavik og 3-1 over Godøy. Tarjei Gjerset Urkedal scora i alle desse tre kampane. Det gjorde han også i sist bortekamp mot Ravn, 3-3 kampen i år 2000. Heilt klart ei lykkebane for unge Urkedal. Norborg kjem frå ein intens kamp mot Emblem der innsatsen var formidabel med ein mann mindre. Same innsats og konsentrasjon i kveld mot eit nervøst Ravn-lag, som har alt å tape i si jakt på spel i 4. divisjon (nivå 5) for første gong sidan 1974, så har vi tru på siger. Finn fram regnjakka og ditt oransje skjerf, og ta turen til Ravn stadion. Forza Norborg!

Det var dramatikk på fleire plan då Norborg og Emblem spelte 0-0 i Uggedalen torsdag kveld. Dramatikken starta like før kampstart då Emblem viste ein e-post frå Sunnmøre fotballkrets at kort frå Bergsøy2 kampane i vår skal bli ståande. Norborg trudde at desse korta skulle strykast og at spelande trenar Niklas Rekdal dermed fekk sitt 5. gule kort i sist kamp mot Sykkylven, ikkje sitt 6. (ein soner for 4 gule kort deretter for kvar andre). Emblem gjorde det klart at dersom Rekdal starta kampen så kom dei til å legge inn protest. Norborg kunne dermed ikkje anna gjere enn å stryke Rekdal frå dommarkortet og han måtte ta plass på tribuna. Dagen etter viste det seg at kretsen hadde feilinformert Emblem og at Rekdal var speleberettiga til kampen. Vi veit ikkje korleis utfallet av kampen hadde blitt med Rekdal på bana, men oddsen for siger med ein av sine beste menn hadde sjølvsagt vore større i det som må reknast å vere ein av haustens viktigaste kampar. Sjølve kampen var jamspelt så lenge laga hadde likt antall spelarar på bana. Like før pause vart Norborg redusert til 10 mann grunna raudt kort. Betre vart det ikkje då vi eit kvarter ut i 2. omgang haurte ein smell og Torbjørn Grytten fall saman med røken akilles. Emblem hadde presset i 2. omgang, men Norborg jobba knallhardt og vann alle duellane i farleg sone. Faktisk var Norborg nær alle poenga då både Oliver Gamlem og Tobias Jensen hadde kvar sin sjanse i sluttminutta i ein kamp som totalt hadde 20 tilleggssminutt. Sette dommar Jan Lund ny personleg tilleggsminuttrekord?
Les meir..