Norborg eigde ballen og skapte mest i heimekampen mot Stranda2, men trass 1-0 leiing til pause etter mål av Niklas Rekdal var det til slutt gjestane som stod igjen med alle poenga etter to kontringsmål av Almantas Gulijevas og Oskar Røyr. Norborg fekk sjansen frå straffemerket like før slutt, men også her vart det bom. – Eg syns vi gjer ein bra kamp, men det blir stang ut, sa trenar Torbjørn Grytten etter kampen. Les meir..

Norborg tek onsdag imot Stranda2 på Uggedal KGB. Stranda2 har starta sesongen bra med 4 poeng på 2 kampar, medan Norborg står med 1. Spelet har vore betre enn poengfangsten, men ein har ikkje hatt marginane på si side framfor mål. Sidan sist kamp er Peder Uggedal Søvik og Kai Kitsadakon tilbake. Vél møtt!

Norborg tapte bortekampen mot Vigra med 4-1 (2-1). Ola Just Martinsen ga heimelaget føringa i det 14. minutt, medan eit sjølvmål sørga for Norborg sitt mål nokre minutt før pause. Uavgjort skulle likevel ikkje halde inn mot kvila. I omgangens sluttsekund fekk Vigra straffe som Preben Meberg omsette i mål. I 2. omgang sørga mål av Kenneth Kjevik og Florin-Ciprian Luli for ein komfortabel siger til Vigra.
Les meir..

Norborg tek onsdag turen Rota KGB for å møte ein av opprykksfavorittane i årets 6. divisjon etter ein litt skuffande fjorårssesong der laget var langt unna å nå A-sluttspelet. Vigra fekk derimot ein god start på denne sesongen med 5-2 siger borte mot Emblem2. Laget haldt også godt følgje med 4. divisjonslaget Hareid i Sunnmørsposten Cup tidlegare i vinter, men måtte til slutt sjå seg slått 2-3 etter eit overtidsmål av Hareid. Lagets store stjerne er rutinerte Kenneth Kjevik, som stort sett ligg på eit mål i snitt pr. kamp.

Norborg leverte ein god 1. omgang i serieopninga mot Sula og fortente meir enn 1-1 til pause. Basert på kamputviklinga kan vi vel likevel seie at det var greit at kampen til slutt også enda med poengdeling. Rykta seie at Norborg blir forsterka med Ruben Holmeset til denne kampen. Om han har kome seg i land så betyr det eit godt offensivt alternativ.

Norborg og Vigra har møttes 10 gongar etter millenniumskiftet. Norborg står med 4 sigrar mot Vigra sine 3. Siste møter mellom laga var i 2015 då Norborg vann 8-1 heime, medan det vart 0-0 på Rota.

Dommar: Lars Ove Sletta (Langevåg)

Stranda2 og Emblem2 tjuvstarta 2. serierunde med å spele 3-3 måndag kveld. Dei andre kampane er Aksla2-Godøy (ons), Herd2-Skodje (tor) og Sula-Ørskog/Stordal2 (søn).

Norborg og Sula spelte 1-1 i 6. divisjon si serieopning på Uggedal KGB. Trass motvind starta Norborg kampen best, men med mange forspelte sjansar måtte ein vente over ein halvtime før midtstoppar Peder Uggedal Søvik styrte inn leiarmålet. Diverre dabba Norborg av etter målet og gjestane utlikna til 1-1 ved Mathias Bjørkavåg. Med skot i både tverrliggjar og stolpe burde Norborg ha leia til pause. Etter kvila endra kampen karakter og gjestane hadde dei fleste sjansane. – Totalt sett greit med uavgjort. Vi gjer gode første 30-35 minutt og spelar då tidvis fin og sjanseskapande fotball. Sula skaper mest etter pause, men vi har også i denne omgangen den største sjansen. Trur også vinden passa det fysisk sterke Sula-laget betre enn oss, så totalt sett ein grei kamp av oss, sa spelande trenar Niklas Rekdal etter kampen. Les meir..

Norborg sitt herrelag serieopnar med kamp mot Sula på Uggedal KGB onsdag kl. 1830. Etter to strake nedrykk er Norborg tilbake i 6. divisjon for første gong sidan år 2000. Motstandar Sula er eit samarbeid mellom Mauseidvåg/Solevåg og Fiskarstranda. Laget kvalifiserte seg i fjor til opprykkssluttspelet, men enda der sist. Laget har styrka seg sidan då med blant anna Vinjar Vedde frå Langevåg. Vi finn også andre rutinerte ex-Langevåg-spelarar som Eirik Hurlen og  Jonas Ona.

Laga møttast i Sunnmørspostcup i fjor vinter. Då vann Norborg 4-1.

Dommar: Bjarte Steinsbu (Brattvåg)

Norborg spelte torsdag kveld treningskamp mot 5. divisjonslaget Giske og måtte sjå seg slått 0-1. Avgjersla fall allereie 20 sekund ut i kampen.
Laget: Ronald Søvik Olsen – Ruben Stavik, Ole Johan Urke, Robin Hånde, Markus Søvik Gunnarsson – Ole Martin Fevåg, Tarjei Urkedal, Kai Kitsadakon, Nizar Aldarwish – Marius Stavik, Markus Torgersen. Innbyttar: Torgeir Vik.

Norborg spelte måndag 2-2 mot Ellingsøy på Nes stadion. Norborg starta kampen best, men greidde ikkje å utnytte sjansane. Det gjorde Ellingsøy som tok leiinga etter tilfeldigheiter framfor mål. Ådne Hellandsvik utlikna nokre minutt seinare i ein omgang Norborg burde ha leia med eit par mål. Etter pause gav Ruben Holmeset Norborg føringa då han sette ein retur i mål. Norborg mista rytma mot slutten av kampen og Ellingsøy tok over spelet. Fem minutt før slutt kom også utlikninga.