Valder – Norborg 4-0 (1-0)
Valdervoll KGB, 03.05.12
Sjansar: 11-1
Cornere: 6-1
1-0 Adrian Blindheim (22)
2-0 Adrian Blindheim (47)
3-0 Stian René Giske (54)
4-0 Henrik Hole Oksnes (83)
Valder vann fullt fortent mot eit tafatt Norborg-lag torsdag kveld. Ingen av laga leverte nokon sprudlande 1. omgang, men Valder leia 1-0 etter at Adrian Blindheim utnytta eit svakt forsøk på tilbakeheading til keeper. 2. omgang startar på verst tenkelege måte for Norborg og heimelagets storscorar får doble leiinga. Norborg har lite å by på og Valder auka til både 3 og 4-0. Norborg var ikkje til å kjenne igjen frå sist torsdag, men så er då heller ikkje Valdervoll kunstgras noko lykkebane. Fire tap av fire mogelege har det blitt.
– I dag manglar vi den gløden og viljen vi hadde sist. Nivået i 4. divisjon er sopass høgt at vi kan ikkje spasere oss til poeng, men vi skal kome sterkare tilbake, sa trenar Roger Gytten etter kampen.
Det var sjeldan høgdepunkt før pause. Begge lag låg bra organsisert og sleit med å finne opningar. Valder hakket kvassast der først og fremst Adrian Blindheim var uromomentet. Ved omtrent halvspelt omgang gav han heimelaget leiinga då han snappa opp ei laus heading mot eigen keeper av ein Norborg-forsvarar. Storscorar Blindheim er kald og lobbar ballen elegant over Geir Roar Gamlem og i nota. Valder kom seg til eit par sjansar mot slutten av omgangen ved Gustav Pettersen og Blindheim, men utan resultat. Alt i alt ein keisam omgang på Valdervoll sitt litt ekle kunstgrasdekke.
Dei få tilskodarane hadde knapt fått kome seg tilbake frå kiosken då Adrian Blindheim auka til 2-0 då han lurer eit par forsvarar og sette ballen i nota. Valder er tydeleg innstilt på å gjere ein betre framtreden etter pause og pressa Norborg tilbake på bana. Knappe ti minutt ut i omgangen legg Stian Giske på til 3-0 då han vinn ein duell utanfor kanten av 16 meteren og skyt via ein spelar og i mål. Dommar Rolf Jarle Eldevik var i denne situasjonen særs snill med heimelaget då han ikkje blåste frispark i duellen forkant av målet.
Valder hadde eit spelemessig overtak gjennom heile omgangen mot eit resignert Norborg-lag. Knappe ti minutt før slutt fastsette Henrik Hole Oksnes sluttresultatet til 4-0 på eit skot i frå 16 meter. Norborg sin første sjanse i kampen kom tre minutt før slutt då Stein Erik Reitan og Tarjei Urkedal gjer forarbeidet til Stian Myklebust, men avslutninga frå 12 meter gjekk utanfor.
Norborg tapte dermed sin første kamp i år mot ein 4. divisjonsmotstandar. Mottak, pasningskvalitet og innsats var langt lågare enn mot Langevåg for ei veke sidan. Ein møtte samstundes eit godt organisert og fotrapt heimelag.
Geir Roar Gamlem var Norborg sin beste spelar. Diverre fekk han seg ein strekk i skuldra på slutten av kampen, men vi får håpe han kjem raskt tilbake.
Laget: Geir Roar Gamlem – Ole Marius Otterlei, Kjell Terje Brusdal, Elling Mikal Kalvø, Asgeir Kalvø (Torgeir Garshol, 59) – Kristian Søviknes (Johan Stavik, 53), André Larsen, Christian Sæther (Stian Myklebust, 59), Ole Johan Urke (Stein Erik Reitan, 85) – Tarjei Urkedal, Trym Nyland (Adrian Holmeset, 69).
Kamphendelsar:
16 min Adrian Blindheim med god sjanse, men lykkast ikkje framfor kassa.
22 min 1-0. Adrian Blindheim sette inn 1-0 då han snappa ballen på 16 meteren.
37 min Gaute Pettersen headar ein corner utanfor.
43 min Adrian Blindheim forsøker seg på volley, men utanfor.
47 min 2-0. Adrian Blindheim dirblar eit par saltstøtter å sette ballen i nota.
51 min Stian Giske skyt over frå 15 meter etter at Valder sin kantspelar kom rundt på høgre og la 45.
54 min 3-0. Stian Giske brøytar ned ein Norborg-spelar og skyt i mål.
71 min Mikal Dyb avanserar 40 meter før han skyt i nettveggen frå 12 meter.
72 min Valder med farleg sjanse etter corner.
73 min Erlend Skjong med gratissjanse etter nok ei laus heading mot eigen keeper. Geir Roar let seg ikkje overliste.
83 min 4-0. Henrik Hole Oksnes finter og skyt i mål frå 16 meter.
85 min Klubblegenda Stein Erik Reitan kjem inn til sin A-kamp nr. 426 for Norborg.
87 min Endeleg kan vi notere ein sjanse til Norborg. Stian Myklebust avsluttar diverre svakt.
