Norborg – Stranda 2-2 (2-1)
Uggedal stadion, 22.05.08
8 sjansar 5
5 hjørnespark 1
0-1 Martin Espelund (21)
1-1 Steffen Grytten (str. 24)
2-1 Geir Ove Grønli (37)
2-2 Sjølvmål (47)
Tilskodarar: 85
Dommar: Rolf J. Eldevik (Ellingsøy)
Ass. Dommarar: Oddmund Kaldhussæter (Blindheim) og Ståle Navelsaker (Aksla)
Laget: Geir Roar Gamlem – Stein Erik Alvestad, Kjell Terje Brusdal, Morten Kalvø, Kristian Furnes – Kristian Søviknes (Kristoffer Søviknes, 69), Steffen Grytten, Adrian Håbet, Stein Erik Reitan (Ole Johan Urke, 75) – Tarjei Urkedal (Jan Even Drønnesund, 90), Geir Ove Grønli (Skjalg Volstad, 84).
– For første gong på tre år seie eg at vi hadde flaks som fekk med oss poeng. Desse orda tilhøyrer Stranda sin trenar Ronny Ødegård. Norborg dominerte nemleg store delar av kampen og burde etter spel og sjansar ha behaldt alle poenga heime i Uggedalen.
Stor spenning på Uggedal stadion då Norborg tok imot Stranda. Etter jamne opningsminutt fekk Norborg kampen sin første sjanse då vi nærma oss ti minutt. Adrian Håbet sette ballen like utafor på eit volleyskot frå 15 meter. Nokre minutt etter kjem Tarjei Urkedal seg igjennom Stranda sitt forsvar, men åleine med keeper Thomas Hove sette han ballen til side for mål.
To kjappe mål
Norborg såg ut til å ha god kontroll bakover, men ved halvspelt omgang kontrar Stranda. Norborg er ikkje organisert og Martin Espelund får avslutte angrepet med scoring frå 16 meter. Gleda varer ikkje lenge for gjestane. Få minutt etter blir det dømt for hands innafor straffefeltet. Steffen Grytten gjer ingen feil frå kritmerket og laga er like langt.
Fortent leiing
Norborg er det førande laget mot eit tamt Stranda-lag som er uvanleg svak i pasningsspelet. Det er dermed fortent då Geir Ove Grønli headar inn 2-1 etter innlegg frå venstrekanten av Tarjei Urkedal.
Surt sjølvmål
Tilskodarane har knapt fått satt seg etter pausen då Norborg klinkar ballen i mål. Diverre i sitt eige. Dermed får Stranda ein perfekt start på omgangen. Gjestane får no blod på tann og er nær ved å ta leiinga like etter, men avslutninga frå 10 meter går over.
Norborg er litt meir stressa med ball i 2. omgang, men kjem seg likevel til store sjansar. Ti minutt ut i omgangen bombarderar Norborg Stranda sitt mål. Først får Steffen Grytten tid og rom på 16 meter, men keeper Hove reddar. Retur fangar Adrian Håbet opp, men også hans forsøk blir redda av Hove. Ballen går så ut til Kristian Søviknes som får sitt skot blokkert.
Stolpetreff
Så er det Stranda som er nær mål med eit stolpeskot frå 16 meter. Det er likevel Norborg som er nærmast sigeren det siste kvarteret. Geir Ove Grønli og Tarjei Urkedal brenn ein dobbeltsjanse, før Tarjei nokre minutt seinare sette ballen i stolpen etter at keeper Hove gir retur på eit av Kristoffer Søviknes. Dermed vart det 2-2 i denne toppkampen.
Det var nærmast utruleg at Norborg ikkje greidde å få inn eit tredje mål i denne kampen. Oransjetrøyene har lov til å vere skuffa, men ein har fått med seg fire poeng i tre vanskelege kampar og med same innsats vil både måla og poenga kome framover.
Mange gode spelarar på heimelaget, men bestemannsprisen vel vi å gi til Kjell-Terje Brusdal. Ungguten vart kasta inn på laget etter at Roger Grytten vart skada i sist kamp, og løyste oppgåva med bravur. Steffen Grytten var sterk i duellspelet og viste også prov på god teknikk.
Neste kamp for Norborg er lokalderby borte mot HaNo komande torsdag.
På notisblokka:
7 min: Stein Erik Reitan legg inn til Adrian Håbet som skyt like utafor frå 14-15 meter.
13 min: Tarjei Urkedal igjennom, men avsluttar utafor åleine med keeper.
17 min: Farleg corner av Stranda. Ufarleg avslutning frå nærmast død vinkel.
21 min: 0-1. Martin Espelund scorar etter kontring. Skot langs bakken frå 16 meter.
24 min: Straffe til Norborg grunna hands. Steffen Grytten sette den sikkert i mål til 1-1.
33 min: Farleg corner av Norborg. Stranda får så vidt avklart.
37 min: 2-1. Tarjei Urkedal legg inn og Geir Ove Grønli stussar i mål.
47 min: 2-2. Sjølvmål av Norborg.
49 min: Stranda med stor sjanse. Avslutning over frå 10-12 meter.
55 min: Trippelsjanse Norborg. Steffen Grytten, Adrian Håbet og Kristian Søviknes med skot.
67 min: Stranda skyt i stolpen frå 16 meter.
77 min: Gedigne Norborg-sjansar ved Geir Ove Grønli og Tarjei Urkedal.
82 min: Tarjei Urkedal skyt i stolpen etter at han snappa opp ein retur frå keeper.
89 min: Stranda kontrar. Skot over.
90 min: Stein Erik Alvestad skyt frå 20 meter. Ballen snik seg utafor lengste stolpe.
