Norborg – Ørsta 3-1 (1-1)
Uggedal stadion, 27.09.08
13 sjansar 7
4 cornere 5
1-0 Tarjei Urkedal (18)
1-1 Kai Robin Myklebust (42)
2-1 Kristoffer Søviknes (54)
3-1 Elling Mikal Kalvø (67)
Dommar: Jan Erik Myklebust (Åmdal)
Ass. dommarar: Jon Olav Skodjereite (Skodje) og Rolf Jarle Eldevik (Elingsøy)
Laget: Geir Roar Gamlem – Elling Mikal Kalvø, Kjell Terje Brusdal, Morten Kalvø, Stein Erik Reitan – Johan Stavik (Skjalg Volstad, 44), Kristian Søviknes (Geir Ove Grønli, 83), Asgeir Kalvø, Ole Johan Urke (Bee, 90) – Tarjei Urkedal, Kristoffer Søviknes (Jan Even Drønnesund, 89).
To angrepsvillege lag skapte god underhaldning for dei om lag 60 som trassa det dårlege veret og møtte opp på Uggedal stadion. Norborg hadde dei fleste og klaraste sjansane og vann fortent.
– Vi gjorde det vi måtte mot eit godt lag. Det er hardt arbeid. Vi kjem oss til sjansar og gav heller ikkje vekk billege mål slik som sist, sa trenar Ivar Roald.
Utgangspunktet for heimelaget var klart. Ein måtte vinne for å sjølv ha kontroll på si eiga skjebne i opprykksstriden. Det klarte gutane til gongs sjølv om ein sløste litt mykje med sjansane denne laurdagen.
Det var likevel gjestane som kom best i gong og hadde spelet det første kvarteret. Men då Tarjei Urkedal sette inn 1-0 frå kloss hald etter strålande forarbeid av Kristoffer Søviknes, fekk ein kontroll på kampen og skapte ein rekke store sjansar i motvinden.
Ørsta hadde vinden i ryggen, men greidde ikkje å utytte dette. Hallgeir Aam hadde eit par skotforsøk som keeper Geir Roar Gamlem hadde god kontroll på. Like før pausen glepp det likevel for Norborg og Kai Robin Myklebust får heade i mål eit innlegg frå høgre. Bittert for Norborg som vann sjansestatistikken 5-3 i denne omgangen.
Etter kvila la Norborg umiddelbart trykk på Ørsta og ti minutt ut i omgangen ordna Kristoffer Søviknes 2-1 etter eit flott angrep der Stein Erik Reitan kom seg ned til kortlinja og la inn framfor mål etter flott veggspel med Ole Johan Urke.
Halvvegs aukar Elling Mikal Kalvø til 3-1 då han styrer inn eit frispark frå Kristian Søviknes. Kalvø hadde få minutt tidlegare brent ein gedigen sjanse åleine med keeper Håvard Aasen. Begge lag har etter dette store sjansar til å score, men fleire mål vart det ikkje og dermed 3-1 og fortente poeng til heimelaget.
Norborg heva seg kraftig frå sist kamp og fekk denne gong meir sting i angrepsspelet sitt. Sjølv om bana var sleip så fekk ein til godt spel langs bakken og viste tidvis godt kombinasjonsspel. Flott kamp av alle, men skal vi framheve nokon må det bli Stein Erik Reitan for sin angrepsvillege stil på backen, og dei to arbeidsmaurane på topp, Kristoffer Søviknes og Tarjei Urkedal.
Dommartrioen merka vi knapt nok at dei var der. Så det tyder vel på ein god jobb.
Norborg skal i neste runde ut i nabooppgjer mot Ørskog på Sjøholt laurdag kl. 1430.
På notisblokka:
2 min: Farleg frispark av Kristian. Kriss avsluttar, men Ørsta blokkerar.
9 min: Hallgeir Aam med skot frå 18 meter. Geir Roar reddar.
18 min: 1-0. Kristoffer med god jobb på høgrekanten. Får lagt inn til Tarjei som scorar frå 3 meter.
19 min: Kristoffer på farta igjen. Er åleine med keeper men finn ikkje nettmaskene.
24 min: Aam testar skotfoten igjen frå 18 meter. Geir Roar reddar.
31 min: Kristoffer finn Tarjei framfor mål, men han sklir ballen over frå 10 meter.
42 min: 1-1. Kai Robin Myklebust headar i mål etter innlegg frå høgre.
44 min: Kristoffer med stor sjanse. Avslutninga trillar mot mål der Tarjei og et par ørstingar kjempar. Ebbar ut i 5-meter.
53 min: Kristoffer er forbi keeper, men ballen går utafor.
54 min: 2-1. Stein Erik spelar vegg med Ole Johan. Kjem seg til kortlinja og legg inn til Kristoffer som putter frå 5 meter.
55 min: Elling Mikal og Tarjei åleine med keeper. Elling avsluttar utafor.
62 min: Aam med god sjanse, men er ikkje i balanse når han skal avslutte. Utafor.
66 min: Kristian frispark på hovudet til Morten. Heading over.
67 min: 3-1. Elling Mikal styrer inn frispark frå Kristian.
68 min: Aam headar eit innlegg utafor.
69 min: Kristian legg til bror Kristoffer som header over.
75 min: Ørsta sin nr. 8 med stor sjanse. Headar over for blankt mål.
79 min: Asgeir skot som keeper gir retur på. Tarjei får ballen, men avslutning redda på strek.
80 min: Dobbelsjanse til Ørsta, men Geir Roar reddar det første forsøket før avslutning utafor.
85 min: Kristoffer med skot utafor. Burde ha spelt Stein Erik som var på veg igjennom.
