Åram/Van.kam. – Norborg 1-2 (1-1)
Eidsåvoll stadion, 03.07.08
4 sjansar 7
4 cornere 7
1-0 Ole Teodor Hovden (str. 9)
1-1 Tarjei Gjerset Urkedal (12)
1-2 Kim Idar Krogsethagen (58)
Dommar: Christer Jensen (AaFK)
Ass. dommarar: Even Dimmen (Hasundgot) og Trygve Halsen (Åheim)
Laget: Geir Roar Gamlem – Elling Mikal Kalvø, Roger Grytten, Morten Kalvø , Kristoffer Søviknes (Kritian Furnes, 46) – Kristian Søviknes (Stein Erik Reitan, 46) (Øyvind Farstad, 88), Adrian Håbet, Steffen Grytten, Ole Johan Urke (Edward Laverton, 85) – Tarjei Urkedal, Kim Idar Krogsethagen .
Norborg sleit seg til tre viktige bortepoeng mot ÅVK torsdag kveld. Etter ein svak 1. omgang vakna oransjetrøyene og kontrollerte kampen etter at Krogsethagen gav laget leiinga.
– Viktig å få tre poeng, sa trenar Ivar Roald etter kampen. Vi gjer ein svak 1. omgang der ÅVK er meir på hogget enn oss frå start, og vi hadde problem med å jobbe oss inn i kampen. Vi fekk meir ro over forsvaret etter pause, og vann greitt sjølv om det ikkje var noko storspel.
Tvilsam straffe
Heimelaget var mest på hogget frå start og fekk tidleg sjansen til å ta leiinga då det vart idømt ei billeg straffe då Oddvin Kragset vart takla av Kristoffer Søviknes. – Ikkje i nærleiken av straffe, sa den uheldige høgrebacken Kristoffer. Ole Teodor Hovden viste ingen nåde å sette straffa utakbart i krysset.
Rask utlikning
Gleda vart ikkje lenge for heimelaget, for tre minutt seinare var det balanse i rekneskapet då Tarjei Urkedal stussa i mål ein corner frå Adrian Håbet. Det var likevel ÅVK som var best den første halvtimen, og spesielt André Pedersen kom seg til eit par store sjansar, men mål vart det ikkje.
Siste minutta av omgangen eig Norborg, og Kim Idar Krogsethagen kjem seg til to store sjansar. Først heada han eit innlegg av Ole Johan Urke i tverrliggjar og over. Så driblar han to mann og sette ballen like utafor stolpane. Positiv slutt i ein svak omgang der heimelaget var best.
Nytt cornermål
Norborg tok kommandoen frå start av etter kvila, og kom seg til fleire sjansar før ein endeleg fann nettmaskene. Og nok ein gong er det på corner Norborg gjer det. Adrian slår presist inn til Kim Idar Krogsethagen som headar i mål.
Norborg har etter dette temmeleg god kontroll på kampen, sjølv om det store spelet sjeldan kom til syne. Spenninga var likevel til stades og når ÅVK spelte lange ballar opp i straffefeltet på slutten kunne alt skje. Men Norborg hadde alt i alt ein grei jobb med å rydde unna.
Dei fleste på Norborg heva seg etter pausen, men Ole Johan Urke gjer mykje positivt i begge omgangar. Det same Tarjei Urkedal med si enorme jobbing.
Ferie med godt samvit
Dette var siste kamp før ferien og Norborg kan ta pause med godt samvit. Laget har kapra 23 poeng og ligg på 3. plass. – Før sesongen så hadde eg vore nøgd med 23 poeng, men når eg ser tilbake på kampane så burde vi hatt fleire poeng. Vi har hatt litt stang ut, og det er det vanskeleg å gardere seg mot. Vi var litt rysta i den perioden Roger Grytten var ute og det viser at det er viktig at forsvaret er intakt. Det er viktig at vi held oppe kondisjonen gjennom sommaren så vi også få ein god start på hausten, sa trenar Roald.
Norborg deltek på Øyacup på Nordøy stadion i helga, medan neste seriekamp er heime mot Vartdal torsdag 7. august.
På notisblokka:
8 min: Etter å ha tenkt seg om dømme dommaren straffe til ÅVK då Oddvin Kragset går over ende.
9 min: Straffa sette Ole Theodor Hovden sikkert i mål.
12 min: Tarjei stusser inn 1-1 etter corner frå Adrian.
18 min: André Pedersen med stor sjanse, men skyt utafor mål frå 10 meter.
20 min: Pedersen får stå åleine på 8 meter å heade ein corner, men nok ein gong utafor stolpane.
25 min: Pedersen skyt frå langt hald. Treff ei tue og ballen får ein voldsam sprett, men Geir redda.
39 min: Ole Johan legg inn til Kim Idar som headar i tverrliggjar.
40 min: Kim Idar driblar eit par mann, men avsluttar utafor åleine med keeper.
47 min: Ole Johan med heading like over etter innlegg av Furnes.
52 min: Ole Johan vinn ballen på miden og slår igjennom Kim Idar, men han avsluttar langt utafor.
55 min: Dobbeltsjanse til Norborg. Kim Idar skyt frå 17 meter rett på keeper. Reitan snapper retur, men avslutning klarert til corner.
57 min: Elling Mikal skyt frå 30 meter. Keeper får slått til corner.
58 min: Kim Idar headar inn corner frå Adrian.
75 min: Pedersen headar like utafor frå 15 meter.
87 min: Tarjei får to strake armar i ryggen og går ned i straffefeltet, men dommar overser det.
