Norborg – Herd 8-1 (2-1)
Uggedal stadion, 11.05.06
16 sjansar 6
4 cornere 5
1-0 Lennart Holmem (9)
1-1 Vebjørn Solevåg (36)
2-1 Kim Idar Krogsethagen (str. 45)
3-1 Eirik York (52)
4-1 Ståle Hurlen (57)
5-1 Lennart Holmem (72)
6-1 Lennart Holmem (str. 74)
7-1 Steffen Grytten (89)
8-1 Tarjei Gjerset Urkedal (90)
Tilskodarar: 84 betalande
Dommar: Hugo Trippestad (Åndalsnes)
Ass. dommarar: Dag Atle Eksund (Emblem) og Lars Ove Sletta (Langevåg)
Tre beste:
Lennart Holmem -8
Eirik York -8
Asgeir Kalvø -7
Laget: Kurt Erik Grytten – Stein Erik Alvestad, Knut Ivar Bjørlykhaug, Steffen Grytten, Stein Erik Reitan – Asgeir Kalvø (Geir Ove Grønli, 76), Eirik York (Kristian Søviknes, 82), Kim Idar Krogsethagen (Tarjei Urkedal, 67), Adrian Håbet – Lennart Holmem (Kristoffer Søviknes, 73), Tarjei Urkedal (Ståle Hurlen, 46)
Norborg var torsdag kveld i skikkeleg spelehumør og nedsabla Herd heile 8-1. Vertane sleit med å omsette sjansar i mål før pause, men etter sidebytte rann måla inn bak gjestane sin keeper. Flott kamp av oransjetrøyene som trengte siger for å halde følge med topplaga.
Det vart til slutt storsiger for oransjetrøyene i denne kampen, men like før pause var det nok mange som hadde “bange” tankar. For etter at Lennart Holmem ga Norborg leiinga 1-0 ti minutt ut i kampen vart sjanse etter sjanse brent. Etter kvart som sjansane gjekk til spille, kom Herd meir og meir med i kampen. Mest grunna slurv hos norborgarane. Ti minutt før pausen kom så utlikninga då Vebjørn Solevåg får stå heilt aleine på 5 meter å heade eit innlegg kontrollert i mål. Målet var ei følgje av ei rekke personlege feil hos heimelaget.
Stormløp
I sluttminutta vart det stormløp mot Herd sitt mål og nye sjansar vart brent, bl. a. måtte Asgeir Kalvø sjå ei heading gå i stolpen. Men Norborg skulle få sitt fortente leiarmål til pause då Tarjei Urkedal vart skubba og dommaren peika på krittmerket. Kim Idar Krogsethagen omsette straffa sikkert i mål. Dermed 2-1 til pause, og fortent, men knapp leiing.
Herd nær utlikning
Herd går hardt ut etter kvila, og kjem seg til eit par sjansar. Vegard Bruland får den største då Knut Ivar Bjørlykhaug sklir på den sleipe bana, og Bruland finn seg sjølv aleine med keeper. Avslutninga frå 13-14 meter snik seg utafor. Norborg var heldige her.
Spel mot eitt mål
I staden for utlikning går Norborg rett opp i 3-1 Eirik York styrer eit lavt innlegg i mål etter godt forarbeid av Adrian Håbet. Dei siste 40 minutta blir det nær sagt spel mot eitt mål og dei vel 100 som møtte opp til kampen, får sjå eit heimelag i scoringshumør. Ståle Hurlen la på til 4-1 då han heada inn eit frispark slått av Knut Ivar. 5-1 kjem på eit flott angrep der Ståle stussar igjennom til Adrian, som tek med seg ballen inn i 16 meteren og spelar uselvisk til ein betre plassert Lennart. Han tek seg god tid å sette ballen sikkert i nota.
Elegant straffe
Minuttet etter blir Tarjei nok ein gong tatt på ulovleg vis innafor straffefeltet og dommaren dømmer straffe. Lennart sette straffa elegant i mål på samme måte som Erik Mykland gjorde i ein landskamp mot Liverpool for nokre år sidan. Minuttet før ordinær tid er ute header Steffen Grytten inn eit innlegg av Kristian Søviknes, dermed 7-1. Nokre minutt på overtid fastsette Tarjei Urkedal sluttresultatet til 8-1 då han kranglar ballen i mål etter eit langt innkast frå Stein Erik Alvestad.
Effektiviteten til Norborg steig kraftig etter pause, og det vart utklassingssiffer mot eit Herd-lag som nærmast gjekk i oppløysing. For i kveld viste oransjetrøyene skikkeleg speleglede og leika seg med Herd-spelarar som var slappe i presset og tydeleg ikkje trivdes på naturgras.
Fleire spelarar på Norborg viste seg fram frå ei god side denne kvelden. Lennart Holmem scora tre mål, skapte mange sjansar og var ein konstant trussel. Eirik York jobba og vann duellar på midten, medan kantspelarane Asgeir Kalvø og Adrian Håbet kosa seg på den sleipe matta. Ståle Hurlen var også svært positiv då han kom inn til 2. omgang.
– Vi gjorde ein god kamp i dag og effektiviteten kom opp på eit bra nivå i 2. omgang, men framleis er det ein del rusk og personlege feil som må lukast bort til kampen mot HaNo, sa trenar Jan Egil Alstadsæter etter kampen. – Vi har spelt jamt med både Blindheim og SIF2, men i dag vart vi totalt utspelt, sa ein av leiarane til Herd.
Norborg sin neste kamp er allereie på måndag. Då står HaNo på Nordøy stadion for tur. Kampen start kl. 1830. Ferge frå Skjeltene kl. 1715.
