Endeleg siger mot Ell.kam

Norborg - Ell.kam 4-0 (1-0)
Uggedal stadion
1-0 Jan Egil Alstadsæter
2-0 Kenneth Gamlem
3-0 Christian Søvik
4-0 Christian Søvik

Dommar: Bjørnar Dahle, Guard

Norborg har dei to tidlegare møta med Ell.kam. denne sesongen ikkje makta å ta alle tre pienga. Sprøsmålet framfor det siste møtet på heimebane førre torsdag var difor om dei endeleg skulle lukkast.

Og det kunne sjå ut som dei hadde bestemt seg for, og tok føringa med ein gong. Lønn fekk dei alt etter 6. minutt då Jan Egil Alstadsæter gjorde det meste åleine på kanten, og avslutta med ein susar i motsett vinkel. Ein flott prestasjon. Norborg fortsette å ha føringa og skapte nokre sjansar, men utan teljande resultat. Midt opp i dette, kom brått Asbjørn Hofseth hjå gjestane åleine med Espen Woldi heimemålet, og han gjorde ei meisterleg utrusting og fekk avverga.

Utover i omgangen var det meir og meir dårleg spel, frå begge laga. Pasningane trefte ikkje, og det var så som så med innsats og initiativ. Det såg mest ut som pausa kom lagleg for dei fleste.

Men trenar Ivar Roald hadde tydelegvis nytta pausa godt, for det var eit "nytt" Norborg-lag som kom på bana i 2. omgang. Alt etter 2 min. kunne Kenneth Gamlem legge på til 2-0 etter lang pasning frå Christian Søvik på hovudet. Keeper feilrekna og det vart enkelt for Kenneth. Knappe 5 min. etter var same Kenneth klart felt på 17-18 m. hald og Christian fekk denne gongen sjansen, noko han utnytta godt. Skotet gjennom muren kunne ikkje keeper stoppe, og 3-0 var eit faktum. Ell.kam. fekk mest ikkje låne ballen i denne perioden og heile 2. omgang styrte Norborg kampen som dei ville.

Vi venta berre på fleire mål, og etter omlag 20 min. fekk Christian ei utsøkt pasning frå Alf Røren, og på andre forsøk fastsette han sluttresultatet til 4-0 til Norborg. Ein siger som var fullt fortent og som kanskje kunne vore eit par mål større, men det viktigaste var likevel dei 3 poenga.

Norborg er såleis i rute mot opprykk, men får nok vanskelegare motstandarar enn Ell. kam. på vegen. På heimelaget spela igjen midtstopparane Karl Andre Birkhol og Terje Tellefsen ein god kamp. Pluss gir vi og til Alf Røren for fine pasningar i midtbana, det er lett å sjå at han har erfaring frå høgare divisjonar, noko som kjem godt med på eit ungt Norborg-lag.

Dommar Bjørnar Dahle, Guard, gjorde ein grei jobb i ein lettdømt kamp.

Helge Uggedal for Haramsnytt