Godkjent innsats av Norborg i Trondheim

I helga var Norborg i Trondheim og spelte dei siste kampane for sesongen i 1. divisjon avdeling Midt-Noreg.

For å redusere reisekostnadane vart det denne sesongen bestemt å avvikle berre enkel serie og dermed vart heile serien avvikla i løpet av tre runder med seriespel. Det vart difor berre to kampar som vart spelt i NTNU sitt idrettsbygg på Dragvoll laurdag for Norborg sin del.

Den første kampen var mot Klæbu og den starta tungt ved at damespelarane tapte sine kampar, noko som i grunn er litt uvanleg sidan dei vanlegvis er Norborg sine sterkaste kort. Til gjengjeld vann herrane alle sine singlekampar og dermed stod det 3-2 til Norborg før double og mixed-double kampane.

I alle desse kampane var det svært jamnt, men Norborg spelarane makta kun å vinne 2 av dei 5 og dermed enda kampen uavgjort 5-5. "Litt irriterande, men trass alt var det berre så vidt vi greidde å stille fullt lag på herresida denne helga på grunn av skade og sjukdom så vi frykta i grunn at det kunne gå værre", seier Noralf Gamlem.

I den neste kampen var det Trondheim sitt førstelag som stod for tur og der tok damene revansje og vann sine kampar. Diverre var ikkje resultata til herrespelarane i stil med første kamp og med tap i alle herresinglane stod det brått 3-2 til trøndarane. Når alle kampane var ferdig stod det 5-5 i denne kampen også.

Dermed vart det verken tap eller siger til Norborg denne helga og laget enda til slutt på 5. plass. "Vi får ta den dårlege plasseringa som inspirasjon for å bli betre til neste år", seier Noralf Gamlem.