|
Om
Bergsøy
Bergsøy melde seg inn i Sunnmøre Fotballkrets 7. mai 1951
og vart opptatt i den tids 3. divisjon. Laget greidde seg godt frå
første kamp, og året etterpå vart fosnavågarane
vinnarar av 3. divisjon. På 1960-talet veksla laget på å
spele i 4. og 5. divisjon etter den gongs system. I 1969 tok laget eit
steg mot toppen av Sunnmørsfotballen då ein vann 4. divisjon
og seinare kvalifiseringa mot Sunndal og Bryn. Møre og Romsdal
hadde den gong eiga avdeling på nivå 3, og Bergsøy
skulle opp mot lag som Molde og Clausenenga.
Bergsøy var på 70-talet eit stabilt godt 3. divisjonslag
og tok fleire pallplasseringar før ein detonerte bomba i 1980
ved å vinne divisjonen framføre Skarbøvik med Tornado,
Ålesund og Stjørdals/Blink hakk i hel. Livet i 2. divisjon
(dagens 1. divisjon) vart kortvarig for herøyingane. Likevel,
ein banka Tromsø 4-1 og gjekk gjennom divisjonen utan å
tape for Åge Hareide og Molde (2-0 og 2-2). Desse poengtapa mot
Bergsøy førte til at Sogndal tok opprykksplassen frå
Molde, som måtte spele kvalifisering.
Etter å ha ete kirsebær med dei store kom kvardagen tilbake
til Bergsøy, og i 1985 var dei tilbake i 4. divisjon Sunnmøre.
Laget har sidan då spelt på dette nivået med nokre
få unntak i divisjonen under. Den dei skal prøve å
kjempe seg opp frå i år.
Styrke:
Unge svoltne spelarar
Frykta heimebane
Divisjonen sin beste spiss
Bergsøy har eit ungt og lovande lag som beit godt ifrå
seg på slutten av fjorårssesongen. Diverre for herøyingane
var det ikkje godt nok til å overleve. Det var først og
fremst ei grusom borteform som sendte klubben ned ein divisjon. Heime
beit ein godt frå seg, noko som vi trur skjer i år også.
No på ny kunstgrasbane. Vel og merke når dei får den
ferdig. Fleire gode spelarar har forlate klubben sidan i fjor, men heim
kom 3. divisjon sin toppscorar Frank Sverre Skorpen. Med han på
plass har dei divisjonens beste spiss. Greier han å overgå
Kim Idar Krogsethagen sine 32 mål frå 2003?
Svakheiter:
Førebuing
Utsett for nabogribbar
Bergsøy stod utan trenar til langt på vinteren, og er på
mange måtar dårlegare førebudd enn mange av dei andre
laga. Til slutt kom Tom Beddari på plass. Ein dyktig trenar gjennom
fleire år hjå Bergsøy. Likevel, få kampar og
nokre månadar utan trenarteam er ikkje bra. Fleire av naboklubbane
sirkulerte rundt Bergsøy sine beste spelarar. Talentet Kjetil
Paulsen vart overtalt av Hødd, Martin Molnberg flytta til Hareid
og vart etterkvart overbevist om å fortsette i 3. divisjon. Toppscorar
og velkjende Preben Hestad trappa ned til 6. divisjon med Tjørvåg,
Jonny Leikanger, fjorårets poengsankar saman med Molnberg i Sunnmørsposten
takka ja til Gjerdsvika, keeper Toni Sandanger gjorde det same, medan
Steffen Moltu bestemte seg tidleg for å gå tilbake til GuLars.
Over halve startelleveren har altså forlatt klubben. Finnst det
nok talent i klubben til å erstatte desse?
Vårt tips: 4. plass
Bergsøy har stort sett tusla å spelt kampar i sin eigen
bakgård før årets sesong.
Det er dermed vanskeleg å seie kva kvittrøyene frå
Fosnavåg står for mot laga nord for Storfjorden. Resultata
i treningskampane har vore av varierande karakter. Frå siger over
Ørsta til stortap for ÅVK. Vi har det vanskeleg å
tru at laget vil gå rett tilbake til 3. divisjon. For mange spelarar
har forlatt skuta til det, men med spissar som Frank Sverre Skorpen
og Gustav Pettersen bør laget kome seg over midten av tabellen.
Vi trur Bergsøy krabbar seg opp til ein 4. plass når "Nye
Bergsøy" blir samspelt.
Nøkkelspelarar: Frank Sverre Skorpen og Gustav Pettersen
Vårt Bergsøy-minne: Aldri møtt dei og aldri
sett dei ute, men i inne-KM i 2002 møttast laga. Då påførte
Norborg Bergsøy sitt første tap på sunnmørsk
jord på lang lang tid. Bergsøy gjekk som mange veit gjennom
3. divisjon utan tap dette året. Frå vår eiga heimeside
har vi henta dette: "I kampen mot Bergsøy heva oransjetrøyene seg
fleire hakk frå kampen mot Vartdal. Laget var meir solid bakover, og
framme på bana vart det jobba bra. Likevel var det Bergsøy som tok leiinga
etter ti minutt ved Frank Sverre Skorpen. Norborg ga ikkje opp, og Morten
Kalvø trefte stolpen på eit godt volleyskot. Utlikninga var det derimot
Kim Idar Krogsethagen som skulle stå for. Bergsøy pressa etter dette
på for eit leiarmål, medan Norborg hadde nokre farlege kontringar. Kalvø
trefte stolpen på eit susande langskot, og Kristian Søviknes var nære
på eit anna langskot. Men eit halvt minutt før slutt skulle Norborg
få utteljing då Kenneth Vegsund får krangla ballen i mål. Dermed
ein sensasjonell siger til Norborg.
|